الأستاذ لبيب ( قصة لمحمد سنجر )

Anonymous كتب "( أخرج من جيبه أدواته المعملية ، لم يأتنا يوما بأدوات كاملة تصلح لعمل تجربة واحدة ناجحة، لم يأخذنا للمعمل و لو مرة ، كان حلم حياتنا الوحيد أن ندخل المعمل و لو لدقيقة واحدة ، كانت حجته لا تنتهي ، قال لنا مرارا أننا لو ذهبنا إلى هناك سنقوم بتكسير أنابيب الاختبار الزجاجية و تبخير الأحماض و تفتيت القلويات و تبديد العهدة التي في رقبته هناك ، كان يخيل لنا أن خلف باب المعمل هناك أدوات خيالية غاية في التعقيد ، عن نفسي تخيلت أن مركبات فضائية معدنية و أطباق طائرة لامعة تحلق في فضاء المعمل ، اعتقدت أنه كان يريد أن يحتفظ لنفسه و لأولاده من بعده فقط بما توصل إليه من علم ، في يوم من الأيام ناداني الواد ( المرسي عطا ) و كان يرتجف من شدة الخوف ، حلف لي وقتها أنه رأى بعينه اللي ها ياكلها الدود (الأستاذ لبيب) و هو بيحط شوية فلزات البرولوسيوم على شوية برمنجانات الترالينيوم و عمل تنين صغير و حبسه في قفص جوه الدواليب اللي في المعمل ، حاولنا مرارا التسلل من الفتحة تحت سور المدرسة الخلفي ، حاولنا الوصول إلى نوافذ المعمل الخلفية ، في كل مرة كان يفضح أمرنا و تتوج محاولاتنا بالفشل . . . . . . . . . . لقد وعدنا ( الأستاذ لبيب ) الحصة السابقة أن نذهب للمعمل اليوم ، و ها هو اليوم يأتينا بأعذاره الواهية ، ـ معلش يا ولاد أصل المفتاح بتاع المعمل اتكسر و لازم نصلحه ، عشان كده جبت لكم إبرة مغناطيسية و مصباح و حجر بطارية جافة . ( عندها سأله زميلنا ( بركات ) متحديا ) ـ و إيه اللي يضمن لنا يا أستاذ لبيب إن الإبرة دي مغناطيسية ؟ ( رد بكل براءة أيضا ) ـ عشان بتجذب برادة الحديد يا ابن بركات . ( ثم وجه حديثة للتلاميذ ) ـ حد فيكم معاه برادة حديد يا ولاد ؟ ( عندها رد أحدهم ) ـ ما جبناش معانا النهاردة يا أستاذ . ( قال و قد بدأ يفقد أعصابه ) ـ على العموم ممكن أحلف لك على المصحف يا ابن بركات إنها مغناطيسية بنت مغناطيسية ، و بعدين طالما أنا قلت لكم إنها مغناطيسية يبقى لازم تصدقوني ، و بعدين قول لابوك يبقى يجيب الفلوس اللي عليه النهاردة ، فاهم و الا لأ ؟ دلوقتي بقى خلونا في التجربة بدل ما نضيع الحصة ، المفروض إننا لو وصلنا السالب و الموجب بسلك ها تمشي الكهربا فين ؟ ( رفع التلاميذ أصابعهم ) ـ قول يا ابن المرسي . ـ في السلك يا أستاذ . ـ الله أكبر ، اللهم صلي على النبي ، إيه العبقرية دي كلها ، إنت بتاخد درس عند مين يا ابني ؟ ـ في البيت عندك يا أستاذ . ( وضع يده خلف أذنه و قال ) ـ مش سامع ، بتقول عند مين ؟ ـ عندك في البيت يا أستاذ . ـ عندي ؟ آآآآآآآه ، عشان كده ، أنا برضه باشبه ، طيب و لو قربنا السلك للإبرة ؟ طبعا ها تنحرف ، و ده معناه إن ...... ( عندها قاطعه ( بركات ) ـ و نعرف منين إن حجر البطارية ده فيه كهربا أصلا يا أستاذ ؟ ( قال الأستاذ و قد ازداد غضبا ) ـ أمال أنا جايب المصباح الكهربي ده ليه يا ابو مخ زنخ ؟ ( قال بركات ) ـ و هو فين السلك اللي ها نوصله باللمبة ؟ إنته كل حاجتك كده دايما ناقصة يا أستاذ لبيب ؟ ( قال الأستاذ و قد أمسك بعصاه و استشاط غضبا ) ـ ما فيش حد معاه حتة سلك يا ولاد ؟ ـ لا يا أستاذ . ( رد بركات محاولا التهدئة بعدما أحس بازدياد غضب ( الأستاذ لبيب ) ـ محلولة يا أستاذ لبيب ، و لا يهمك ، فيه مسمار أهو في التختة ، ممكن نحط اللمبة فوق المسمار و البطارية تحته ، اللمبة تنور . ( عندها انفجرت الدموية بوجه (الأستاذ لبيب) ، جحظت عيناه ، كاد الدخان يخرج من فتحات أنفه ، حاول كبت الغضب الذي سيطر عليه للحظة واحدة ، أخذ يطرق بعصاه الخيزران فوق الطاولة يسألها ) ـ بقى إنتي يا تخته ( طرق بعصاه فوق الطاولة ) لو حطينا اللمبة فوق المسمار هنا ( طرق ثانية بعصاه فوق الطاولة ) و البطارية تحت المسمار هنا ( طرق بعصاه تحت الطاولة ، ثم سكت للحظة ، ثم أكمل تساؤله ) اللمبة تنور يا تخته ؟؟؟؟؟ ( فجأة أصبح (الأستاذ لبيب) خارج السيطرة ، صرخ بكل قوة ) ـ قولي لبركات ابن الوزة . ( عندها انهال على بركات بعصاه الغليظة ، عندها انزلقنا جميعا تحت الطاولات نتقي ثورة غضبه ، سمعنا صراخ ( بركات ) يستنجد ، حاولنا استراق النظر من خلال الطاولات ، وجدنا (الأستاذ لبيب) يرتكز بركبته اليمنى فوق الطاولة و قد انهال على (بركات) الذي تكور أرضا ، بدأت العصا تتناثر عاليا ، أخذت تتساقط شظاياها الساخنة فوق رؤوسنا ، أخذ يردد ) ـ قولــــــي لبركـــــــــــــــات ابن الـــــوزة ، قولــــــي لبركـــــــــات ابن الـــوزة ، قولــي لبركــات ابن الـــوزة ، قولي لبركات ابن الـوزة ، ( أخذ صوت (الأستاذ لبيب) بعدها يخفت تدريجيا بينما بدأت قواه تخور رويدا رويدا ) " أرسلت في Friday, July 03 بواسطة admin